《飛曱甴的可怕》
兩個人搬出嚟住會有好多麻煩事、矛盾同磨擦，但講到最恐怖嘅一定係飛曱甴。
有晚十一點零，正當我沖好涼準備打吓機嘅時候，老婆一聲巨響，我第一時間跪低，心諗自己做錯咩事？碗洗咗啦！去廁所都有沖廁啊！唔通係過期野？
正當我仲好猶豫嘅時候，佢話佢見到黑色物體係天花飛過，我心諗，係唔係咩飛蛾之類咋，須知道屋企我一向都打掃得好乾淨，每星期都用漂白水清潔。講真我都有少少眼訓，做吓樣咁周圍巡查吓之後，我想報告無發現之際，係我書櫃突然發現一隻黑色物體，望多眼，我就大叫！嘩！！！！
老婆當然已經閃咗入廁所，我好想大叫媽咪，以前有曱甴一定係叫老豆老母去解決，佢地可以好冷靜咁殺咗佢，有時仲拎住佢觸鬚係我面前嚇我，我即時閃咗入廁所：「有曱甴啊！！！」
我老婆冷眼咁望，眼神講咗句：呢度得我同你，你唔係要我去殺啊嘛！？
我眼神問：你去殺係唔係一個可行嘅方案？
佢眼神殺咗我一次之後，我就退出咗廁所，然後抱起我隻狗入廁所，再拎起殺蟲水，將門關好，只有我同曱甴係客廳戰鬥！來吧！FIGHT！！！！
我對住佢一噴，無死到，佢受到驚嚇騰飛起來，好彩佢都驚我，如果佢直接撲向我臉的話，相信我會即時暈低，然後佢飛去電視、沙發等，我連環追擊，佢仲飛咗落我掛起嘅西裝度，我好似唔駛錢咁將佢地圖炮地噴灑係每個地方！最後佢避咗入沙發底……
我老婆大叫得未啊！
我入去同佢講入咗沙發底，佢大叫咁你仲唔快少少殺死佢！
大佬啊，沙發底我點殺啊！
拉開佢囉！
咁重點拉？
你唔係想今晚同佢一齊訓啊！？
我心諗，又係喎，呢個心腹大患不除不行啊！
最後我用咗九牛二虎之力將沙發推開，再係角落見到佢反肚，但腳仲撐撐吓！我二話不說再同佢淋浴！我覺得最後我係用殺蟲水浸死佢！
沖佢落廁所之後，仲未完事，因為比我周圍噴嘅殺蟲水佢可能佢爬過嘅地方我都要清潔，搞咗我成個幾鐘先完事……
有時我諗返起，老豆點解唔驚曱甴，依家我明。
因為你怕曱甴而唔殺佢，你耳邊嘅人會用聲波攻擊你，仲會無時無刻用言語同拳頭招呼你，我望望隻曱甴，再望望我老婆，邊個恐怖？
唔……我心入面有答案了。
Search